ثقافة الادخار

بعض الناس يؤمنون بمقولة ( اصرف مافي الجيب يأتيك مافي الغيب ) و يطيرون فلوسهم في اول اسبوع من نزول الراتب

 ... هل هذا التصرف صحيح ؟ صحيح اذا كنت ولد مليونير و ما عندك مستقبل تخاف عليه او ما تبغى تتعلم الاستقلالية المادية 

اعرف ان بعض الناس يؤمنون ان الادخار مو من صفات الاغنياء لكن خلونا نتكلم عن شخص في بداية حياته ، اول راتب شهري له هو مكافأة الجامعة او راتب بوظيفة 3-4الاف ، فكيف نبغى شخص مستواه المادي محدود انه يستثمر و يفتح مطعم و يسوي له ماركه و يكبر فلوسه و نسبة الفشل كبيرة ؟ كيف يجيب راس مال بدون ديون ؟ 

اولا : 

لازم نؤمن ان مهما كان المرتب الشهري حقنا احنا نقدر نحقق اللي نبغاه ، و انا اقصد بهذا الكلام اللي في سن ال18-28 لان غالبا ما بيكون عليهم التزامات ماديه كبيره ( سيارة ، بيت ، مسؤولية عيله ) 

يعني مصاريفنا بتكون احتياجات شخصية + كماليات + اكل + فاتورة جوال ، و بما ان مصاريفن تتمحور حول شخص واحد فسهل ندخر لهدف مثل : 

1- دراسة بعد التخرج . 

2- تسجيل في معهد .

3- للطوارئ .

4-جلسات ليزر .

5- سفر .

6- للإستثمار .

7- للتطوير الذاتي ( دورات في تخصصك ) .

8- استعداد للزواج و تكاليفه .

9- ممكن للدلع بعد التخرج .

10- جهاز ضروري ( لابتوب ، ايباد ) 

طيب الفلوس ما تكفي !! الا تكفي بس طريقة التقسيم غلط ، بختار مثال مكافأة الجامعة بما ان اغلب اللي يتابعوني طلاب ، فراح نقسم 800-900 ريال لأقسام ... 

* احتياجات ( شي ضروري ، لابد من شراءه .. مثل الشامبو و فرشاة الاسنان 

* كماليات ( شي مو مره مهم ، ممكن تأجيله .. مثل الملابس و الالعاب و ادوات القرطاسية فيه ناس يحبون يجمعونها 

شي مو لازم يكون عندك الان ، هو شي كمالي و ليس ضروري 

بعطيكم اسهل طريقة و ما بقول جمعوا فواتيركم و اكتبوا في دفتر و سووا مخطط بياني ، نبدأ :
1-   نآخذ مبلغ الادخار فور نزول الراتب و نعزله ( الافضل يكون كاش مقفل عليه او في بطاقة خاصة للإدخار و ما تقدر تسحب منها .. اما تسوون تمويه و تشترون فيها من المواقع بالغلط لاااا ما يصير ، ركزوا على هدف الادخار 

كما ان مبلغ الادخار ما يتمشى معاكم ، ما يدخل المحفظة اليومية حقتكم 

و اهم نقطة ( ممنوووع تتسلفون من نفسكم ) و لا من غيركم 

2- حددوا معدل شهري للصرف 

اذا كان الادخار 100 +400 احتياجات +100 ترفيه بسيط -800 المكافأة = 200 الباقي و يرجع للإدخار 

تذكروا ان مو كل فلوسكم تخلصونها ، عادي الزايد تحطونه مع الادخار 

اذا كنتوا تروحون مطاعم و مقاهي شبه يومي طبيعي تخلص فلوسكم ، فتحتاجون تركزون في البداية وين تصب انهاركم 

عشان تعرفون المبلغ التقريبي في الاشياء الغير مهمة و اللي تقدرون توفرون فيها ، و قر ايش تقريبا تصرفون في السوبرماكت 

بتمر عليكم اوقات عندكم التزامات كثيره مهمه ( تصليح جوال ، ادوية ، دورات ، علاج ، هدية لمناسبة مفاجئة ) و ما تقدرون تتدخرون فعادي تاخذون بريك شهر او شهرين لكن حافظوا على الهدف و استمروا 

حتى انا اوقات اوقف ادخار ، ماني مثالية و ملتزمة المهم احس اني متحكمة و اعرف ادير الامر 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نخرج شوي عن الادخار لشي شوي حساس : 

لا تكابرون 

ادري اننا كنساء نبغى الاستقلال المادي ، لكن تذكري ان ( ابوك\اخوك\زوجك) من دورهم و حقهم عليك انهم يوفرون احتياجاتك ، شيء من حقك 

مو شي تستحين منه او يقلل من قدرك لما تطلبين و لا يبين انك ماديه دلوعه 

ربي من سابع سموات الزم الرجل بهذا الواجب تجاهك 

و ايش المشكلة لو تدللتي ؟ آنسه مستقله و تدلل من اللي يحبونها و مسؤولين عنها 

ماهو شي مخجل او يقلل من جهودك و استقلاليتك 

لا تكابرون 

ادري ان فيه عوائل ما يصرفون على بناتهم بس يدخلون الجامعة ، لكن قد يكون هذا عُرف في مجتمعهم

لان البنت ما تعودت تطلب ريال او لان مو شايفين فيه حاجه لذلك .. و تكبر و ترتبط و تنصدم ان زوجها ما يعطيها 

و تتوقع انه تلقائيًا المفروض يعطي و تتوهم انه بخيل و تتألم في الظلام ... و الحقيقة المخفية انها ما تعلمت كيف تطلبمن اهلها وانعكس هذا الشي على علاقتها بشريكها ، او انها من جانب آخر تحس بالعار لو اخذت فلوس لانها تعودت على الطريق الاصعب 

اكرر من حقك 

من حقك مو شي يتفضل فيه عليك 

اكسري الحاجز ، اطلبي و خففي ضغط على نفسك
اطلبي بشكل صريح بدون ( ممكن ؟ تقدر ؟ ..الخ
هذه الطريقة فيها تخيير للطرف الثاني خصوصا مع الرجال
طريقة فهمهم مختلفه عننا كنساء
اطلبي بصريح العبارة عن المبلغ اللي تحتاجينه

 ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نرجع لموضوع الادخار ..

قلنا ان ٥ % محفوظة في الثقب الاسود + مبلغ تقريبي للإحتياجات + مبلغ ترفيه او يحول للإدخار 

طيب فيه ناس يدخرون بس فجأه يطير المبلغ ، السبب لان هدف الادخار مو واضح
الشخص اللي وده مره مره يسافر راح يلتزم و يمسكها للحظة السفر
بينما لو الهدف رغبتنا فيه مو مره حقيقية اول ما تجي رغبة اقوى تآخذ الجهد كله في لحظات


ــــــــــــــــــــــــــــــــــــــــــــــــــــــــــ

ضبط النفس تجاه الماديات يحسسنا بقوتنا على المثيرات الخارجية لان دايما فيه شي جديد احسن من اللي عندنا
و دايما فيه اعلانات ، لكن اني انتصر على هذا كله و اوصل لهدفي المالي يعني اني اقدر اتحكم و اوازن رغباتي و اعي بإحتياجاتي و عندي وعي مو  اي احد يسيرني ولا اي اعلان يحفزني له ... نفس لما نسوي دايت

هرجة  الادخار لها تأثير نفسي عميق ، معناها ( اني اقدر نفسي لو فلست ، اقدر اشيل نفسي ، فيه امان مادي ، فيه دافع للنجاح ، و انها دليل على قدرتنا على ضبط النفس و التحكم برغباتها ) لان الشخص اللي يرمي فلوسه في كل شي حوله و يفلس سريعا قدرته في ضبط نفسه تجاه رغباته ضعيفه و ما يفكر بالمستقبل ولا بالنتائج

القمار و هوس الشراء لهم نفس التأثير النفسي و النشوة

الجزء الثاني