تجربتي لعملية الفكين بالتفصيلdouble jaw surgery
اهلاً اهلاً..
بشارككم رحلتي مع عملية تصحيح الفك من بدايتها ، من وقت ما اكتشفت المشكلة و لما قررت ، مرحلة قبل العملية و اثناءها و بعدها ، اول اسابيع و شهور حتى اوصل للنتيجة ، و ايش تحتاجون و ايش تاكلون فبتكون التدوينة قابله للتحديث لين يمر 8 شهور-سنة واحط لكم خط اصفر بالنهاية
-ملاحظة اي احد مو في باله يسوي العملية ما انصحه يقرأ لاني بذكر تفاصيل مو حلوة-
الفهرس :
- البداية .
- يوم العملية و التنويم
- اول شهرين
- نصائح بتساعدكم
- طريقة الاكل
- تفريش الاسنان
- الشغل
- النوم
- الصلاة
- الطلعات
- الاكل و التغذية لأول شهرين
- تطورات التعافي في بقية الشهور
- الشهر السابع و الجانب النفسي
- النتيجة
تبدأ القصة لما كنت طفلة مصابة بالربو و اواجهه مشكلة في التنفس مما يخليني اعتمد على فمي و لأن الفك في مرحلة نمو فتغير شكله و صار عندي تأخر في الفك السفلي و توسع في العلوي مع ميلان بسيط و هذه تعتبر مشكلة وظيفية لان مو مهمة الفم التنفس و يمكن يكون فيه عامل وراثي لحدوث هالشي ، امي لاحظت المشكلة بعمر ال8 سنين تقريبًأ و بدأت تبحث لي عن موعد مع طبيب فك و للأسف ما كانوا الاطباء ياخذون الموضوع بجدية و ان كل الاطفال اسنانهم بارزة بس حولوني على التقويم.. مرت الايام ، كنت احب ابتسامتي اللثوية و ما واجهت تنمر و لا مشاكل الصراحة لكن كنت انزعج من اني ما اقدر اقفل فمي و احس عضلاتي مشدودة و ماني مرتاحة و ابغى اتنفس منه ، فقلت ليش لا ؟ راحة و شكل احلى
لاني كنت اراجع في مستشفى حكومي فقائمة الانتظار طوييلة ، جاني موعد التقويم بعمر ال18سنة و اسناني مرتبة اصلا اول ما قابلت دكتورة التقويم قلت لها اني ابغى حل و ما اعرف اذا فكي اكتمل نموه عشان ما يبقى لي الا الحل الجراحي ، حولتني على دكتورتي مها القطان استشارية جراحة الوجة و الفكين شافتني و شخصتني كلاس 2 مع ميلان خفيف ، سويت اشعة للتأكد ان الفك اكتمل نموه او يقدرون يسوون حل غير جراحي.. و النتيجة زي ما انتوا شايفين
هذه صورة للعضة السليمة ( كلاس 1 )
( كلاس 2 ) تقدم العلوي عن السفلي
( كلاس 3 ) تقدم السفلي عن العلوي
خطتي العلاجية كانت : خلع جميع ضروس العقل + خلع الضواحك السفلية + جهاز توسيع الفك العلوي + تقويم
ليه كل هذا الخلع ؟ عشان يحتاجون مساحة للقص
مواعيدي كانت بعيدة <كل شهر موعد> و مع كورونا قسم الاسنان تقفل سنة و شوي فأخذ الموضوع معايا 6 سنوات حتى اخلص من مرحلة ( ما قبل العملية ) و اذا بتسألون كيف صبرت ؟ ما ادري ، ما كنت اعاني كثير فما كنت مستعجلة
2022
في يوم مشرق كلموني قسم الجراحة عشان آخذ القياسات الاخيرة ونتفق على اللي بيصير و كان كالاتي:
( حجم الابتسامة اللثوية 9mm و لاني ابغى جزء منها يبان فبيكون رفع الفك العلوي 6mm و تقديم السفلي
و اتفقت مع دكتورتي ان اي اجراء تجميلي تشوف اني احتاجه تسويه مثلا تقديم الدقن )
.. كان عندي اسبوعين و نص اختم الحياة و آكل كل ماهو مقرمش و لذيذ و اقابل كل الاصدقاء و الاحبة ، سويت كل شي الا اني اجهز نفسي ، ما سألت عن تفاصيل و لا مسامير و لا خياطة و لاشي ، ما اشتريت مشروبات و لا ادري عن شي ، كان في مخي حفلة و سباق مع الزمن اني افّل و آكل و الحمدالله ان هذه كانت همومي.. و الشي الوحيد اللي جهزته غرفتي المليئة بالترفيه
ليلة العملية :
هنا استوعبت الجد ، حنسويها يا منال خلاص مافي مجال للتراجع اشتغلنا عليها سنين و خلعنا ثروتنا ( اسنان) و حان اليوم المنتظر
حتى ما كملت وجبتي الاخيرة من الخرشة..
يوم العملية : 14\6\2022
دخلت غرفة العمليات الساعة 10ونص الصباح ، سألتني دكتورة التخدير اذا كنت خايفة او متوترة و قلت لها شوي الا القاها حطت لي مهدئ ، كييف انا ذيب و الذيب ما يهيبه شي!!.. نمت و انا مبسوطة ههههههههه
مدة العملية 4-6 ساعات لكن ما ادري ليه خرجوني متأخر و فتحت عيني الساعة 8 الليل في غرفتي ، وجهي ملفوف بشاش و كمادات باردة ، جسمي مخدر الممرضة حطت بيدي جهاز الnurse call و ما كنت قادره اضغطه حتى
قضيت اليوم الاول كذا ( اصحى اسأل امي الساعة كم ، استفرغ دم ، انام ) و كررت نفس الموضوع 4 مرات
- و فيه حوار داخلي و استشير نفسي اسوي العملية ولا ، من الصدمة ما صدقت اني سويتها و ما عاد فيه مجال للتراجع-
اليوم الثاني :
شالوا المغذي عشان آكل فبدأت اشرب موية و عصير بإبرة و طبعا ربعه يدخل فمي و الباقي برا ، تحركت شوي و كنت اقدر اروح الحمام الله يكرمكم
فكوا الشاش و الكمادات و شفت وجهي منتفخ و شفايفي متورمة ، ما احس بوجهي من تحت عيوني لين نص رقبتي ( و كل يوم يقل اكثر) اخذوني لعيادة الجراحة و سويت اشعة و قابلت دكتورتي و نظفت فمي و حطت لي المطاطات و تحلطمت عندها اني مسكينة ما كنت ادري وش بيجرى لي و رجعي لي خشمي و احس اني مغدورة حتى الانتفاخ شكله مرعب مو نفس اللي باليوتيوب شكلهم كيوت..
طمنتني و قالتلي ان العملية ناجحة والمقاسات مزبوطة و خشمي بيرجع حلو و سوت لي استطالة بالشفايف عشان شفايفي لما ابتسم ما تختفي..
طبعا لازال الوضع صدمة و استشير نفسي وانا قدني سويتها خلاص و وجهي شكبره من الانتفاخ..
و جانب آخر ان المسكنات تهد الحيل ، يدي صارت متورمة و مزرقة و توجع > هذا شي ما كنت اعرفه
مو شرط تجربتكم مع المسكنات تكون زيي يعتمد على طاقم التمريض و جسمكم ، مو كل الناس يتعبها الموضوع
طبعا الكلام نفس لما تتكلمون بفم مقفل و بلسانكم بس يتحرك ، محد بيفهمك الا اللي يحبك عاد
اليوم الثالث :
الحياة اشرقت شوي و قدرت اتروش ترويش جاف ( بدون شعري) و اتحرك و اشرب..
كل 6 ساعات يحطون لي مسكن و ما كنت بصحة كافية اني ارجع البيت الا في اليوم الخامس و تختلف المدة من شخص لشخص لا تخافون لو طولتوا ، بالنسبة لي كانت زيارة الناس اللي احبهم تؤنسني فلو احد حاب يزوركم استقبلوه بالكمامة عادي
و شفت دكتورتي و سويت دراما شوي : وين خشمي رجعي خشمي ؟
كنت مره خايفه على خشمي و استودعته الله اول شي هههههههههههه
تذكير كل يوم جديد هو يوم احسن من اللي قبله تذكروا هالشي طول الاسبوعين الاولى
العودة للمنزل ( الشهر الاول ) :
-اول اسبوع
هنا مفاجآت كثير شيقة تبدأ بأن الدواء ما اقدر افتح فمي و ابلعه فكان لازم اطحنه و احطه في ابرة و اصبه بين اسناني.. مرارة اكثر من مرارة الحياة الدنيا
كنت اتعذب كل ما جات الساعة 10 لان المضاد لازم ينأخذ و اجيب حولي دعم نفسي لان يكفيني ما جرى لي مع ذلك كنت سعيدة اني سويتها فحاولوا ما تدققون كثير و تعيشون اليوم بيومه و تخلون لكم روتين
روتيني كان كذا : اصحى الساعة 9 اشرب موية + اشرب حليب شوفان بارد او عصير و آخذ الدواء ، العب ننتيندو سويتش ، اتفرج مسلسل ، اذا كنت مصحصحة العب لعبة تركيب ، اقرأ اوقات ، العب ننتيندو عشر مرات ، اتفرج يوتيوب ، آخذ قيلولة كل الظهر ، اتحرك شوي بالبيت و باليوم ال13 صرت اقدر امشي كثير بدون ما ادوخ فأطلع امشي ساعة و ارجع و برضو ممكن تخلون الناس اللي تحبونهم يزورنكم ، بيغير نفسيتكم و أنصحكم تسوون جو ترفيهي في غرفتكم و تسمعون لجسمكم اذا حسيتوا اليوم ان عندكم طاقة تحركوا اذا حسيتوا بتعب ارتاحوا.. لاني لاحظت ان اللي ما جهزوا روتين ترفيهي يكتئبون بعد العملية
بالنسبة للمهام اليومية كنت مرهقة جدا ما اقدر اتحرك و اشيل و احط و لا اقدر اركز عشان اسوق او اخرج بدون احد ، ما اقدر اشيل شي ثقيل حتى شنطتي على كتفي توجعني عارفين لما تطلعون من سخونة و جسمكم يصير تعبان ؟ زي كذا
فخلوا احد يسوي اكلكم و يجهزه و يرعاكم بختصار ، مره صعب تسوون العملية و تعتنون بأنفسكم بالكامل لازم فيه احد
من المشاكل الجسدية اللي حسيتها في هالفترة صداع قبل النوم ، وجع بالاذن ، دوخة ، الشفايف تحرق ، البشرة تتقشر و تصير مو حلوة و مهما اعتنيت تصير اسوء <فترة و تعدي ما عليكم>
في اليوم الخامس حسيت عضة اسناني قوية و تزيد لما انسدح عشان انام ، تقريبا 3 ايام ما قدرت انام احس عضلات فمي كلها مشدودة ، رحت المستشفى و غيروا المطاطات لشيء اخف و اعطوني حبوب ترخي العضلات
بعد ما تخففت المطاطات صرت اقدر افتح فمي شوي و ارمي الحبوب في فمي و اشرب موية و ابلعها
الاسبوع الثاني الانتفاخ قل و صحتي صارت افضل ، اقدر اسوق اقدر اطلع بس الدوخة لازالت موجودة
هذا اعتبره اسبوع العسل لانك تحس انك نجوت خلاص و تقبلت الواقع و تعايشت من وجهك و عدم تحكمك باللعاب
و صرت تختار مشروباتك راضي و قنوع و يومك السعيد لما يوصل عصيرك المنشود
- الشي العجيب ان مافي ألم بالفك نفسه ابدا ، ما قد حسيت بوجع فيه طوال فترة التعافي الحمدالله-
الشهر الثاني :
هذا الشهر كنت مبسوطة فيه اكثر لاني رجعت لشغلي و خيارات الاكل صارت اكثر و ان شاء الله اني ما عاد بشرب شوربة الا برمضان بعد هذه التجربة
في هالشهر شالوا المسامير و الخياطة و صرت اقدر افتح فمي و أشيل المطاطات وقت الاكل و ارجعها
و اعطوني فيتامين ب12 و من وقتها و انا كل الاحساس اللي بوجهي قاعد يرجع
بس مافي اي ألم و النوم لسا ملخبط و الانتفاخ لسا موجود و واضح اكثر شي عند الخشم و الشفة العلوية
مافي لعاب ينزل و الشفايف صارت بحجمها الطبيعي لكنها منملة ، وجهي صار كأني بطة الانتفاخ بالوسط
الوضع هنا حلو بس وجهك لازال مو وجهك ..
على نهاية الشهر الثاني بدأت احس بقرصات في وجهي الاعصاب قاعدة تشتغل زي ما يقولون
و شعور نغزات بين فترة و فترة ، الاكل صار شبه طبيعي يعني اي شي اقدر اقطعه قطع صغار آكله
اي شي مو قاسي زي الجزر اقدر آكله و وزني قاعد يرجع..
نصائح بتساعدكم :
- استمتعوا بروتينكم الجديد عشان نفسيتكم ( لا تكونون انتوا و الزمان عليكم )
- جهزوا ملابس بأزارير او فتحة رقبة وااسعة .
- تنظيف الانف بالبداية بعود اذن مبلل ، شغلوا فلاش و نظفوا بشويش
- خلوا دايما حولكم موية و اشربوا بقد ما تقدرون .
- اشربوا عصاير طبيعية احسن من المعلبة او كمية السكر فيها 3جم .
- شاركوا دكتوركم ملاحظاتكم و تساؤلاتكم .
- لا تحكمون على شيء و لا يجيكم احباط ان هذه النتيجة .
- الانتفاخ بيطول ، بيطول يا اصحابي..
- استخدموا للشفايف كريم الاطفال بيباثين او فازلين طبي
- كلوا مايكروبيوتيك تحتاجون مناعة كويسة بعد المسكنات و المضاد ( اختاروا قوة ضعيفة اذا مو متعودين عليها )
طريقة الاكل :
بما اني جربت كل الطرق بختصر عليكم التعب ، تحتاجون :
- مصاصات شفافه فتحتها صغيرة و لينه > آسفه لكل سلاحف العالم بس ما اقدر اموت جوع
او ابرة تغذية او علبة صلصة
- سفرة ( تستخدم ك مريلة )
- طاولة السرير ( نفس حقت اللابتوب )
- مناديل ثقيلة انصحكم بورق تنشيف الايدي انترفولد ( لان المناديل العادية تذوب بسرعه)
- مراية ، مهمة مره لانكم ما تحسون بشفايفكم و تحتاجون تشوفون الاكل وين راح
- ممكن تخلون جنبكم منشفة تحطونها بحضنكم لما تشربون موية
و الوضع كالاتي = تلبسون السفرة و تقربون طاولة الاكل منكم و تشربون بالمصاص و المراية قدامكم و مناديل حولكم
في البداية بتحسون انكم تبذلون مجهود في الشرب عادي ، المهم تغذوا كويس
في الاسبوع الخامس و السادس نفس الشكل بس بدل المصاص ملعقة صغيرة ، بالنسبة لي الشوكة الصغيرة كانت اريح
طريقة التفريش و التنظيف :
- فرشاة اسنان للاطفال و كل ما كان راسها صغير احسن و ناعمة جدا ( soft or extra soft )
- معجون
- غسول الفم اللي يكتبه الدكتور لكم
- الخيط المائي كويس لكن اذا ما عندكم ما حسيت انه ضروري جدا ، ما استخدمته الا لما اشرب سلطة
و طبيعي ان تفريشكم ما بيكون نفس قبل
الشغل :
هذه تعتبر من العمليات الصعبة اللي التشافي فيها يطول فيعطون اجازة شهر
بالنسبة لشغلي كأخصائية نفسية يتطلب اني اتكلم و اتواصل فما قدرت ارجع لشغلي الا بعد شهر ونص
رجع النطق عندي واضح و قدرت ارجع لعيادتي
النوم :
دكتوركم بيقولكم اذا يصير تتقلبون او تنامون على ظهركم
في البداية تبتلشون بحجم الخد لين تكتشفون السدحة المريحة ، بس بعد شهر لما صحصحت عجزت انام
هو حماس هو نشاط مدفون ما اعرف ، اضطريت آخذ ميلاتونين عشان انام
وش الميلاتونين ؟ هرمون النوم الطبيعي يساعد هرمونكم يشتغل و تنامون بالليل
و عموما هذه من الاعراض الجانبية للبنج ان يكون فيه لخبطة بالنوم
الصلاة :
ينصح بأنكم تصلون جالسين اول اسبوع و بعدها انتوا و قدرتكم
بالنسبة لي كنت اصلي جالسة لين راحت الدوخة لان آخر امنياتي اهبد بالارض
الطلعات :
طلعت في الشهر الاول 3 مرات بسس لاني اذا خرجت اجوع و اتنرفز و ابغى ارجع البيت
الكمامة تكتم ، اللعاب لسا ينزل ، اذا بشرب شي حوسه و مناديل ما كنت انبسط بالطلعة غير ان مافي طاقة للحركة الكثير
الشهر الثاني حلو كنت اطلع و عندي طاقة و خيارات الاكل اكثر و اقدر اسوي كل شي زي السواقة
بس البس كمامة لان التورم واضح و ما ابغى احد يشوفني فيه
تغذية الشهر الاول :
- حليب ، هوت تشوكلت ، حليب بالشوفان و القرفة بارد ، حليب بروتين ، شاهي عدني
- لبن ، لبن فراولة
- شوربة قرع ، شوربة خضار ، شوربة عدس ، شوربة دجاج بالكريمة ، شوربة ذرة ، مرقه
- عصيرات الفواكه الطازجة
- قهوة باردة
- سلطة معصورة
- ثفة بالحليب ( شي يعرفونه امهاتكم مفيد للعظم المكسور )
- اي شي سائل يجيبونه اهلي اشربه حتى لو ما ادري وش هو..
- حليب انشور ( تغذية سائلة متكاملة ) ما جربته
- شوربات جاهزة للتحضير .
تغذية الشهر الثاني : هنا الدلع و الاكل الطري
مثال على وجباتي /
1- خيارات الفطور :
قهوة ، بيض مهروس مع جبنه شيدر
هوت تشوكلت ، سيريلاك
حليب مع ويتابكس ( شي يشبه الشوفان تلقونه في قسم الكورنفليكس قيمته الغذائية حلوه و فيه بروتين )
ميلك شيك ( فراولة + حليب + بذور كتان + اي بذور مفيدة..)
2-خيارات الغداء :
سليق ، جريش ، رز مصري ، روزيتو ، فتة ورق عنب ، رز طري مع تونة ، سوشي مهروس ، مكرونة
ملوخية و رز
3-عشاء و سناكات :
زبادي بروتين ، زبادي بنكهات ، سلطة معصورة ، عصيرات ، ايسكريم فواكه ، سيريلاك ، بطاطس مهروسة مع جبنة
ترامسيو ، كيكة الزعفران ، كيكة بالحليب ، سلطة خيار و زبادي
الشهر الثالث :
فتحة الفم اصبعين و صرت آكل كل شي حتى القاسي بس بعض الاشياء اطول فيها زي الخبز قضمه مو سهل
الاحساس بوجهي جهة اليسار رجع 90% اما اليمين 20% خصوصا تحت الفم مافي احساس ، الشفايف رجعت لحجمها الطبيعي لكنها متنملة ، الانتفاخ لازال وااضح طبعا اخف من اول شهر بس لسا وجهي مو وجهي و انا هنا تأزمت صراحة
اشتقت لوجهي و بديت احس اني تعودت على هالوجه المتورم اللي مو عاجبني..
و الحمدالله مافي اي ألم بس قرصات الاعصاب و شكل الانتفاخ مضايقني
الشهر الرابع و الخامس :
لازال التورم موجود لكنه اقل من السابق ، الاحساس بالجهه اليمنى 50% رجع اما اليسار 100%
لازال وجهي مو وجهي لكن بقية الامور سهاله الحمدالله ، فتحة الفم صارت 3 اصابع
الشهر السادس و السابع و الجانب النفسي :
اعتقد ان حالتي اطول حالة التورم بقى فيها ههههه لسا منطقة الانف و حوله منتفخه و حجمه اكبر من قبل العملية لكن كل فترة الآحظه يصغر فمو مركزة كثير عليه ، الاحساس ضعيف في الذقن و الشفاة السفلية متنلمة ، الابتسامة حلوة الحمدالله و العضة مزبوطة و خلاص وقفت استخدم المطاطات و شلت التقويم ..
مر الشهر السادس علي و انا اتصور بالنص ، نص وجهي من تحت او من فوق ما كنت قادره اتقبلهم مع بعض و ما كانوا عاجبيني على بعض و هذه تعتبر سلوكيات امان غير مفيدة فصرت اتصور بدون فلتر صورة كاملة عشان اساعد نفسي اتقبل وجهي الجديد
في السابع لاحظت مشكلة نتيجة الفك العلوي حلوة بس السفلي ما عجبتني و تأزمت نفسيًا لان لازال انطباق الشفايف مزعج و لازلت احتاج اشد عضلات ذقني حتى اسكر فمي ، هذه الشهور مره اصعب نفسيًا من غيرها و تراودني فكرة الندم و ان التعب مو قد النتيجة و احساس بعدم الرضا و ان وجهي مو راكب على بعضه بس هذه حالة طبيعية يمرون فيها الناس لما يسوون عمليات تأثر على الشكل فيكون فيه شعور بالفقد تجاه شكلهم القديم و المخ لسا ما تعود على الشكل الجديد و يرفضه بالذات لما تكتشف ان العملية مو شرط تنجح 100% هذه المعلومة ما يقولونها الجراحين عادة ان العملية ما تعتمد بس على شطارتهم و خفة يدهم هي كمان توفيق من الله فما يضمنون لك نتيجة 100% و دكتورتي كانت صريحة معاي بهالموضوع انه مو سحر
بالنسبة لي خرجت ب70-80% الحمدالله فما افكر اعيدها لنتيجة افضل هي توفيق من الله و ربي اختار لي نتيجة تناسبني و بأقل ضرر و الحمدالله كل احد شافني الحين يقول محلوه و وجهك صغر و ابتسامتك طبيعية و شكلك متغير للأفضل و صار عندي خدود حلوه بسبب رفع الفك العلوي ... لو كنت تمر بهذه المرحلة ارجو انك ما تخلي نفسيتك تخليك تتخذ قرار صعب و تدخل في دوامة عدم الرضا لان عالم العمليات فيه جانب مضر نفسيًا و احتمالية اكتئاب ما بعد العمليات و احتمالية قلق في حال كان عندك توقعات عالية
و كوني اخصائية نفسية فبشارككم دراسات عن الاثر النفسي بعد العمليات التجميلية و اللي لها تأثير تجميلي اضغط هنا
اذا تم تشخيصك من طبيب باضطراب تشوه صورة الجسم فالعملية ما راح تعالج الامر حتى لو نجحت 100%
و اتمنى ان تجاربكم تمر بأقل ألم نفسي لانها بدون مجاملة صدمة جسدية و نفسية تحس وش جابني هنا و مين انا
نرجع لموضوع شد عضلات الذقن تناقشت مع دكتورتي عن المشكلة لاننا قبل حطينا احتمالية اني اسويها بعد عملية الفكين فقررت لي عملية جينوبلاستي تقديم الذقن 6mm تعتبر بسيطة يومية و بنجها موضعي شعوري الان و انا اتجهز لها اني خايفة مو من الالم او الانتفاخات ، خايفة من التجربة النفسية تنعاد و ارجع اتقبل وجهي
الشهر التاسع :
لازال فيه تنميل في شفتي السفلية جهة اليمين بس و بين فترة و فترة تطلعلي انتفاخات صغيرة في الذقن.
الشهر العاشر :
التنميل لسا موجود و اعتقد انه ما راح يروح ولازم اتعايش ان جهة من فمي ما احس فيها الا 70%
جاني ألم فضيع في خدي و كان يزيد كل يوم لدرجة يصحيني من نومي ، طلع ان المسامير و الصفايح توجعني بسبب البرد
رحت المستشفى و سويت اشعة و قررت دكتورتي اني اسوي عملية ازالة للصفائح بس بعد ما اكمل سنة.
-----------------
النتيجة :
بما اني اكتب هذه التدوينة في بدايات التعافي و الوجه لازال متورم فما اقدر احكم لكن اللي شايفته و ملاحظينه اهلي ان استقامة الفك مزبوطة و الميلان راح و الوجه صغر و التنفس عندي مره فرق ، اول مره احس اني اتنفس من خشمي الحمدالله
طبعا النتيجة الحقيقية تبان في الشهر السادس لين سنة
تحديث: الان وصلت الشهر السابع و راح اقول ان النتيجة حلوة بنسبة 80% راضية فيها و تغيير واضح كل احد يقول انه حلو الحمدالله
و عقبال اي شخص وده يسويها يحصل على نتيجة ترضيه و تسعده
التحديث الاخير:
بعد مرور سنة و6 شهور بتاريخ 10/12/2023 قررت اني ما اسوي عملية تقديم الذقن
و راح اشيل الصفائح ان شاء الله لما يستعدي الامر
نتيجة العميلة راضية عنها جدا جدا و من احلى القرارات اللي اتخذتها بحياتي
التنميل في الذقن الايمن لسا موجود و تقبلته ، الابتسامة حلوه و الانطباق و شكل الفك طبيعي جدا
انصح اي احد عنده مشكلة بالفك و يحتاج العملية يختار دكتور يناسبه و يتوكل على الله و يسويها .