الدعم النفسي (1 )

 

الدعم النفسي من اعظم الامور الانسانية اللي تربطنا ببعض ، اهتمامنا ببعضنا في اسوء الايام و التعاطف و المشاركة تأدي فرق 

لكن السؤال كيف نسوي هالشي و بالشكل السليم ؟ كيف ندعم الناس اللي حولنا نفسيًا و نساعدهم و نوفر لهم مساحة آمنه ؟ 

فكل انسان يعيش صراعات فرديه ، و كل شخص يجاهد في قصته بطريقته 

و تخفيف رحلة العيش من انبل الامور اللي نقدر نقدمها لبعض 

فإذا لجأ لي شخص مصاب بالألم ، نعم فهو مصاب و لم يختر شعوره .. ايش اسوي ؟ 

1- اسأله : كيف اقدر اساعدك ؟ 

افهم منه الطريقة اللي يحب اسانده فيها ، ممكن يحتاج اني اجلس جنبه بدون ما اتكلم ، يمكن يحتاج يفضفض و انصت له ، يمكن يحتاج يسمع اشياء تذكره بنفسه القوية ، و يمكن يبغى وقت لحاله .

2- التواجد 

وجودك حوله و الاهتمام بالسؤال عن حاله و الاطمئنان عليه ، سواء بأنك تقابله بإستمرار او ترسل رسالة او تتصل عليه 

احيانا نحتاج شخص يشعرنا اننا مهمين وسط شعورنا بأن العالم تخلى عنا . 

3- الانصات بقلبك بلا احكام 

كون شخص لجأ لك في ضعفه و ألمه فهذا يعني انك قلب آمن له ، و هذا مو وقت نصح و لا احكام و لا تصحيح و لا تقييم للشي اللي تعرض له ، يكفي الانصات له و شعورك به . 

4- التذكير 

ذكره انك بتكون جنبه مهما حدث ، و نظرتك ما تغيرت له و ان اللي يمر فيه من وجع ما يعني انه فشل او استسلم ... ذكره بأهمية وجوده بحياتك و عن تفهمك للي يمر فيه و ان محاولاته لها معنى و انه لما يحتاجك لا يتردد يكلمك . 

5- الترفيه عن حاله 

اضافة القليل من البهجه و تجربة شيء جديد او التنزه ممكن يخفف من شعوره .

_________

فيه اشياء ممكن نقولها بإعتقاد انها بتخليه يشعر بالقوة و يواجه ما يمر فيه لكنها بالعكس مدمره ، مثل : 

" لا تكبر الموضوع ما يستاهل الزعل " 

" انت حساس و دلوع " 

" لا تصير سلبي " 

" فيه ناس صارلهم اسوء منك احمد ربك "

" تدور استعطاف ؟ "

" توقعت اقوى من كذا " 

" هذي دراما " 

...الخ 

حتى احنا كمتلقين للدعم نحتاح نفهم ان طرق الدعم مختلفه ، فيه ناس يعرفوا يواسون بتواجدهم و فيه ببعدهم و فيه بالهدايا البسيطة و غيرها من الطرق اللي مغزاها يخفف مما نشعر به 

- انتهى .