life coach | مين هو مدرب الحياة
في هذا الموضوع استنعت بصديقة في طريقها لتصبح مدربة حياة عشان اتأكد من النظام في السعودية و سألت معلمي اللي درسني انقلش كونه يعمل ايضا كـ life coach في امريكا ... فخلونا نشوف مين هو اللايف كوتش ؟ و ايش دوره ؟ و ايش حدود عمله ؟
ينقسم لنوعين :
كلهم بالعربي تدريب بس شفت اقرب معنى لهم ..
1- training ( دورة او فترة تدريبية )
2- coaching ( تدريب فردي او جلسة او استشارة مهنية )
هو الاكثر شيوعا ، يآخذ المدرب دورة لمدة اسبوعين عن كيف يسوي دورة و كيف يتعامل مع الجمهور و كيف يسوي حقيبة تدريبية
و كيف يسوي عرض باوربوينت ، بعدها يآخذ تصريح معتمد من منطقته لمزاولة اقامة الدورات ، لكن لمين هذا النوع من التدريب ؟
لأي احد عنده خبرات و مهارات يقدر يدرسها الناس ، مثلا شخص دارس صيدلة يقدر يسوي دورة كيف تشتري منتجات بشرة
جيدة و صحية ، او اخصائي تغذية يسوي دورة عن السمنة ، او اخرى تخصصها رياض اطفال تسوي دروة التعامل مع غضب الاطفال ... و في كل العالم شهادة التدريب هذه تخليك فقط تقدم شي في مجالك ، يعني ما ينفع تآخذ دورة كيف تصمم دورات
و تسوي دورات التعامل مع الماضي المؤلم
كما ان هذا النوع من التدريب جانبه نظري و يركز على كيف تنقل معرفتك للناس
و للأسف الكثير يعتقدون ان هذا يؤهلهم يتعاملون مع اشياء حساسة
نجي للقسم الثاني Coaching :
هذا النوع من التدريب يتبع مؤسسة الاتحاد الدولي للمدربين ( ICF ) و عندهم 3 مستويات للحصول على ترخيص التمكين الشخصي او اللي احنا نقول عنه لايف كوتش .. لهم ساعات معينة لابد يتجاوزونها و عندهم ميثاق اخلاقي ينص على :
- عدم التدخل بأي شكل من الاشكال في طفولة العميل و ذكريات الماضي .
- عدم محاولة علاج العميل من اي مشاكل نفسية او اضطرابات .
- عدم استخدام اي طرق غير اخلاقية و لا مهنية مثل ( الطاقة ، الثيتا ، الشاكرات ، الابراج ..الخ )
ايش دوره ؟
يساعدك تفهم شخصيتك ، يركز على تنمية مهارات ، يعتمد على الحوار و ما يعطي معلومات و لا حلول ، يستخدموه عادة في التأهيل المهني ... زي ايش الوظيفة اللي تناسبك ؟ ايش المهارات اللي بتخدمك في الوظيفة ؟ كيف تكون قاذد ناجح ؟ كيف تنمي الذكاء العاطفي عندك ؟ كيف تتعامل مع ضغوط العمل ؟ كيف تسوي خطة لتحقيق اهدافك ؟ كيف ترفع اداء موظفينك ؟ ايش نقاط ضعفك و قوتك ؟ ... هذا نطاق وظيفته فقط ، ما يدخل في مشاعرك و لا ايش تعرضت له في طفولتك و لا يستخدم اي وسائل علاجية عليك .
الفرق بينهم ان واحد يساعدك تختار تخصصك الجامعي و ميولك المهنية ، و آخر درس شي و بيعطيك من علمه و تجربته ، نقدر نقول الاول يعلمك كيف تسوي كيكة بالخطوات في دورة تحضرها في ايام او ساعات محدودة .. بينما الآخر يعرف اخطاء كيكتك فيركز على تحسينها و ينمي مهاراتك
محد من الاثنين مصرح له بالتعامل مع الذكريات المؤلمة و لا عنده العلم و لا التدريب الكافي للتعامل مع شي زي كذا
و لو شفتوا احد يسمي نفسه لايف كوتش و يروج لنفسه انه يتعامل مع المشاعر و المشكلات النفسية و عنده طرف علاجية
فأعتذر لكم هذا دجل و لا مهنية و استخدام غير قانوني لشهادة التدريب
و رأي شخصي .. زمان كان الدجال يستخدم مظهر التقرب من الله وفصاحته لأجل يكذب على الناس و ان الله اصطفاه من بينهم ، هذا الشي يحدث الان لكن بشكل آخر .. الان الدجال يتأنق بأحسن الثياب و يتكلم بثقة عالية و ثقافة وهمية و يستخدم مهارات اقناع تُدرس و كلامه المنمق اللي يدعم اكاذيبيه و يرفق مع بكج الدجل " دكتور تنمية بشرية " علما ان مافي شي بالعالم و لا الجامعات المعتمدة
شي اسمه دكتور لايف كوتش و لا دكتور تنمية بشرية ، يقولون شهاداتهم من برا بس في الحقيقة هي من منتج في منطقة استوائية
اخذوا فيه دورة مدتها اسبوعين او شهر و رجعوا بأحجار و سلاسل و افكار غير منطقية و لا علوم حقيقة
دائما اقول اسأل اهل الاختصاص في اموركم ، لا تستهينون بعلمهم لانهم يدرسون جوانب كثير مختلفه من العلم مختلف جدا عن الهاوي اللي قرأ الجزئ اللي يحبه بس ... لو رجلي مكسورة هل بروح لطب شعبي و لا طبيب عظام ؟ المسألة بالزبط نفس كذا
المدرب دوره يساعدك توصل لهدفك المهني فقط
الاخصائي النفسي دوره يعالج مشاكل بسيطه ( الثقة بالنفس ، مشاكل العلاقات ، الشعور بالذنب او الخزي ، الانفعالات الغير متزنة ) و الاضطرابات النفسية زي ال( الاكتئاب و القلق و ...الخ ) و كل واحد درس ليخدم مجاله
ختامًا :
من حقكم في اي خدمة تحصلون عليها تعرفون شهادة مقدمها
لا تسمحون لأي احد يعبث في ذكرياتكم بهدف التحرر و التنظيف و بطرق غير آمنه و لا اخلاقية و ليست علميه حتى ، مجرد تفتيح جروح و يترككم تعانون لحالكم .